ភ្នំពេញ ៖ គម្រោងចំនួន ៩ ជាមួយនឹងទុនវិនិយោគប្រមាណ៤២០លានដុល្លារអាមេរិក ត្រូវបានលើយកមកពិនិត្យនិងពិភាក្សា ក្នុងកិច្ចប្រជុំច្រកចេញ-ចូលតែមួយ” លើកទី២ ក្នុងឆ្នាំ២០២៦ ។ ការលើកយកមកពិនិត្យនិងភាក្សាលើគម្រោងទាំងនេះ ស្របតាមសំណើរបស់ក្រុមហ៊ុនសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ ។
បើតាមសេចក្ដីប្រកាសព័ត៌មានរបស់គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១០ កុម្ភៈ ២០២៦ បានឱ្យដឹងថា គម្រោងវិនិយោគទាំងនេះ មានទុនវិនិយោគសរុបប្រមាណ ៤២៣លានដុល្លារអាម៉េរិក អាចបង្កើតការងារបានប្រមាណ ៥ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មចំនួន៧គម្រោង រួមមាន៖ ផ្គុំដំឡើងគ្រឿងអេឡិចត្រូនិក បរិក្ខារអគ្គិសនីនិងបរិក្ខារអគ្គិសនីបំភ្លឺ, ផលិតប្រដាប់ព្យួរសម្លៀកបំពាក់, ផលិតសម្ភារៈតុបតែងសម្រាប់ពិធីបុណ្យ (បុណ្យណូអែលនិងបុណ្យ Halloween) និងវត្ថុអនុស្សាវរីយ៍, ជ្រលក់ពណ៌, ផ្គុំដំឡើងម៉ូតូ, ផលិតក្តារបន្ទះ និងផលិតក្រដាស, វិស័យទេសចរណ៍ចំនួន១គម្រោង៖ សាងសង់ និងធ្វើអាជីវកម្មសណ្ឋាគារផ្កាយ៥ ចំនួន ១.៣៤១បន្ទប់, និងវិស័យកសិកម្ម និងកសិ-ឧស្សាហកម្មចំនួន១គម្រោង៖ បង្កើតកសិដ្ឋានបណ្តុះមេផ្សិតនិងផ្សិតគ្រប់ប្រភេទ និងវេចខ្ចប់កសិផល (ផ្សិត)។
បើតាមក្រុមប្រឹក្សាអភិវឌ្ឍន៍កម្ពុជាឱ្យដឹងថា គម្រោងវិនិយោគទាំង៩ដូចបានរៀបរាប់ខាងលើនេះ បានបោះទីតាំងនៅរាជធានីភ្នំពេញ ខេត្តតាកែវ កំពង់ស្ពឹ កំពង់ឆ្នាំង និងស្វាយរៀង ។
គួរបញ្ជាក់ថាក្នុងខែដំបូងនៃឆ្នាំ ២០២៦នេះ ក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីលើគម្រោងវិនិយោគ ចំនួន៤៣ ជាមួយដើមទុនប្រមាណ ៧៥២លានដុល្លារអាមេរិក ឌែលអាចបង្កើតការងារបានប្រមាណ២ម៉ឺន៦ពាន់នាក់ ។ បើប្រៀបធៀបនឹងខែមករា ឆ្នាំ ២០២៥ ចំនួនគម្រោងវិនិយោគ មានការថយចុះ ប្រមាណ ៣៧ភាគរយ ខណៈដើមទុនចុះបញ្ជីវិនិយោគមានការកើនឡើងប្រមាណ០,៤៥ភាគរយ ៕
