ភ្នំពេញ ៖ ក្រុមហ៊ុន HGB Auto ដែលជាក្រុមហ៊ុនទទួលបានសិទ្ធិនាំចូលនិងចែកចាយរថយន្តម៉ាក Mazda ផ្ដាច់មុខកាន់ទីផ្សារប្រទេសកម្ពុជាបានចេញសេចក្ដីប្រកាសព័ត៌មានមួយ ឱ្យភ្នាក់ងារលក់ ដែលមិនមានសិទ្ធិអនុញ្ញាតបញ្ឈប់ជាបន្ទាន់នូវការនាំចូលរថយន្តម៉ាក Mazda មកកាន់ទីផ្សារប្រទេសកម្ពុជា ។
យោងតាមសេចក្ដីប្រកាសព័ត៌មានរបស់ក្រុមហ៊ុនHGB Auto បានឱ្យដឹងថាក្រុមហ៊ុន HGB Auto គឺជាដៃគូយុទ្ធសាស្ត្រ និងតំណាងចែកចាយជាផ្លូវការរបស់ក្រុមហ៊ុន Mazda ប្រទេសជប៉ុន ប្រចាំប្រទេសកម្ពុជា ហើយក្រុមហ៊ុនមានសិទ្ធិពេញលេញតាមផ្លូវច្បាប់ក្នុងការនាំចូល ចែកចាយ និងផ្ដល់សេវាកម្មក្រោយការលក់សម្រាប់រថយន្ត Mazda គ្រប់ស៊េរីរួមបញញចូលទាំងវត្តមាននៃរថយន្តអគ្គិសនី ( EV) ជំនាន់ថ្មីដែលជានវានុវត្តន៍ចុងក្រោយបង្អស់របស់ MAZDA ។
សេចក្ដីប្រកាសបន្តថា រាល់ប្រតិបត្តិការលក់ និងចែកចាយរថយន្ត Mazda ដែលធ្វើឡើងតាមរយៈក្រុមហ៊ុនអេចជីប៊ី អូតូ គឺជាការអនុវត្តស្របតាមកិច្ចសន្យាផ្ដាច់មុខ និងបទប្បញ្ញត្តិស្ដីបីការនាំចូលរថយន្តថ្មីមកកាន់ទីផ្សារកម្ពុជា ព្រមទាំងត្រូវបានទទួលស្គាល់ជាផ្លូវការដោយក្រសួងពាណិជ្ជកម្ម ។
ដើម្បីជាឆ្លើយតបទៅនឹងការចរាចរណ៍លក់នូវរថយន្តដែលមិនទាន់ទទួលបានការអនុញ្ញាតឱ្យនាំចូលចែកចាយ ជូនទៅដល់អតិថិជនប្រើប្រាស់នាពេលថ្មីៗនេះ តាមរយៈភ្នាក់ងារលក់ដែលមិនទទួលបានសិទ្ធិអនុញ្ញាតស្របច្បាប់ ក្រុមហ៊ុនសូមប្រកាសឱ្យបញ្ឈប់ជាបន្ទាន់នូវទង្វើមិនស្របច្បាប់នេះ មិនឱ្យលើសពីមួយខែចាប់ពីពេលជូនដំណឹងនេះតទៅ បើមិនដូច្នោះទេ ក្រុមហ៊ុននឹងរក្សាសិទ្ធិអនុវត្តទៅតាមផ្លូវច្បាប់ចំបោះភ្នាក់ងារលក់រថយន្ត MAZDA ដែលគ្មានការអនុញ្ញាតទាំងនោះ ក្នុងនោះដើម្បីចូលរួមការពារទៅលើសុវត្ថិភាពរបស់អតិថិជនរបស់យីហោ MAZDA ជាចម្បង ជៀសវាងការប្រើប្រាស់ចំរថយន្តដែលគ្មានស្តង់ដារអនុញ្ញាតត្រឹមត្រូវ ៕
