ក្រុមហ៊ុន WorldBridge Group និង​​ក្រុមហ៊ុនបារាំង​ SEMMARIS ចុះហត្ថលេខាលើកិច្ចព្រមព្រៀងសេវាកម្មដើម្បីចាប់ផ្តើមការសិក្សាលទ្ធភាពសម្រាប់គម្រោងទីផ្សារលក់ដុំអន្តរជាតិនៅរាជធានីភ្នំពេញ

ភ្នំពេញ ៖ ក្រុមហ៊ុន WorldBridge Group និងក្រុមហ៊ុនមកពីប្រទេសបារាំង​ SEMMARIS ដែលបានគ្រប់គ្រង និងដំណើរការ Marché International de Rungis នៅទីក្រុងប៉ារីស ដែលជាទីផ្សារលក់ដុំអាហារស្រស់ធំជាងគេបំផុតមួយលើពិភពលោកអស់រយៈពេលជាងហុកសិបឆ្នាំមកហើយ បានចុះហត្ថលេខាលើកិច្ចព្រមព្រៀងសេវាកម្មមួយដែលបង្ហាញពីការចាប់ផ្តើមនៃការសិក្សាលទ្ធភាព និងផែនការមេសម្រាប់ទីផ្សារលក់ដុំកសិ-អាហារអន្តរជាតិដែលបានស្នើឡើងនៅភ្នំពេញ ដោយយកគំរូតាមទីផ្សារ Rungis ដ៏ល្បីល្បាញ។

ពិធីចុះហត្ថលេខានេះត្រូវបានធ្វើឡើងនៅសណ្ឋាគារ Shangri-La ភ្នំពេញកាលពីថ្ងៃទី​១០ កក្កដា ២០២៦​ ដោយមានវត្តមានលោក​ Bertrand Ambroise នាយកអភិវឌ្ឍន៍អន្តរជាតិនៃក្រុមហ៊ុន SEMMARIS និងអ្នកឧកញ៉ា សៀ ដានីញ៉ែល នាយកប្រតិបត្តិនៃក្រុមហ៊ុន WorldBridge Group។

ពិធីនេះក៏មានការចូលរួមពី ឯកឧត្តម Nicolas Forissier រដ្ឋមន្ត្រីប្រតិភូបារាំងទទួលបន្ទុកពាណិជ្ជកម្មបរទេស និងការទាក់ទាញវិនិយោគ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្មកម្ពុជា និងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មុនពេលភាគីទាំងពីរចុះហត្ថលេខាលើកិច្ចព្រមព្រៀងនេះ។

ពិធីនេះក៏មានការចូលរួមពីមន្ត្រីរដ្ឋាភិបាលជាន់ខ្ពស់កម្ពុជាមួយចំនួនផងដែរ រួមមាន ឯកឧត្តម មាស សុខសេនសាន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក ប៉ែន វិបុលសក្តិ នាយកអភិវឌ្ឍន៍គម្រោងនៅអគ្គនាយកដ្ឋានភាពជាដៃគូរវាងរដ្ឋ និងឯកជន (GDPPP) ក្រសួងសេដ្ឋកិច្ច និងហិរញ្ញវត្ថុ ដោយបានគូសបញ្ជាក់ពីកម្រិតនៃការចាប់អារម្មណ៍របស់រដ្ឋាភិបាលចំពោះគម្រោងនេះ។

បើតាមសេចក្ដីប្រកាសព័ត៌មាន​របស់ក្រុមហ៊ុន Worldbridge Group បានឱ្យដឹងថា ក្រោមកិច្ចព្រមព្រៀងនេះ ក្រុមហ៊ុន SEMMARIS នឹងផ្តល់ជំនួយបច្ចេកទេសដល់ក្រុមហ៊ុន WorldBridge Group លើការសិក្សាលទ្ធភាព ដោយប្រើប្រាស់ជំនាញរាប់ទសវត្សរ៍របស់ខ្លួនក្នុងការប្រតិបត្តិការផ្សារ Rungis។ ការសិក្សានេះនឹងវាយតម្លៃលើទីផ្សារម្ហូបអាហារ អចលនទ្រព្យ ឃ្លាំង និងតម្រូវការភស្តុភារកម្មរបស់ទីផ្សារលក់ដុំនៅភ្នំពេញ រួមជាមួយនឹងការធ្វើផែនការបច្ចេកទេស និងទីតាំងដែលត្រូវការដើម្បីអភិវឌ្ឍបង្កើតផែនការមេ។

សេចក្ដីប្រកាសព័ត៌មាន​ដដែល បាន​ឱ្យដឹងទៀតថា កិច្ចព្រមព្រៀងនេះឆ្លុះបញ្ចាំងពីក្រុមហ៊ុន WorldBridge Group បានបន្តប្តេជ្ញាចិត្តក្នុងការនាំយកហេដ្ឋារចនាសម្ព័ន្ធលំដាប់ពិភពលោក និងជំនាញអន្តរជាតិមកកាន់វិស័យកសិកម្ម និងចែកចាយចំណីអាហារនៅកម្ពុជា ស្របពេលជាមួយនឹងការធ្វើឱ្យកិច្ចសហប្រតិបត្តិការសេដ្ឋកិច្ចរវាងកម្ពុជា និងបារាំងកាន់តែស៊ីជម្រៅ។ ទីផ្សារដែលបានស្នើឡើងនេះមានបំណងពង្រឹងការតភ្ជាប់រវាងកសិករ អ្នកលក់ដុំ និងអ្នកចែកចាយកម្ពុជា ជាមួយនឹងហេដ្ឋារចនាសម្ព័ន្ធផ្សារទំនើបៗ ដែលត្រូវបានបង្កើតឡើងចំគោលដៅដើម្បីជួយគាំទ្រដល់ការអភិវឌ្ឍរយៈពេលវែងនៃខ្សែសង្វាក់ផ្គត់ផ្គង់ចំណីអាហាររបស់ព្រះរាជាណាចក្រកម្ពុជា ។​

នៅក្នុងឱកាស​នោះ ឯកឧត្តម​ឌិត ទីណា រដ្ឋមន្ត្រីក្រសួង​កសិកម្ម រុក្ខា​ប្រមាញ់ និងនេសាទ​ បានមានប្រសាសន៍ថា ការប្តេជ្ញាចិត្ត និងកិច្ចសហការរួមគ្នាយ៉ាងជិតស្និទ្ធរវាងវិស័យឯកជនកម្ពុជា និងបារាំង ស្តែងចេញជាគំរូល្អមួយសំដៅលើកកម្ពស់ជីវភាពប្រជាពលរដ្ឋ និរន្តរភាពសេដ្ឋកិច្ច ធានាបាននូវសន្តិសុខស្បៀង និងចូលរួមចំណែកអភិវឌ្ឍន៍សេដ្ឋកិច្ចជាតិ។
ឯកឧត្តម​បន្តថា ក្រសួងកសិកម្ម រុក្ខា​ប្រមាញ់​និងនេសាទ នឹងផ្តល់ការគាំទ្រ លើការសម្របសម្រួលបច្ចេកទេស ដើម្បីធានាថាដំណើរការសិក្សាសមិទ្ធិលទ្ធភាពនេះ ប្រព្រឹត្តទៅដោយរលូន ត្រឹមត្រូវតាមបទដ្ឋានបច្ចេកទេស និងសម្រេចបានតាមផែនការគ្រោងទុក៕