ភ្នំពេញ៖ លោក លាង ឡេង ម្ចាស់សហគ្រាស លាង ឡេង និងកូនប្រុសច្បង ក្រោមការដឹកនាំផ្ទាល់ពី ឧកញ៉ា តែ តាំងប៉ ប្រធានក្រុមប្រឹក្សាភិបាលសមាគមមូលនិធិសម្ដេចតេជោ និងជាប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានដឹកនាំសមាជិកក្រុមប្រឹក្សាភិបាល និងថ្នាក់ដឹកនាំសមាគម ចូលជួបសម្ដែងការគួសម និងពិភាក្សាការងារជាមួយ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ដើម្បីរាយការណ៍អំពីវឌ្ឍនភាពការងារ និងទទួលនូវអនុសាសន៍ណែនាំដ៏ខ្ពង់ខ្ពស់សម្រាប់ទិសដៅការងារបន្ត នាថ្ងៃទី១៣ ខែឧសភា ឆ្នាំ២០២៦។
នៅក្នុងជំនួបដ៏មានអត្ថន័យនេះ ឧកញ៉ា តែ តាំងប៉ បានគោរពជម្រាបជូនឯកឧត្តមរដ្ឋមន្ត្រី អំពីសកម្មភាពការងារកន្លងមករបស់សមាគមមូលនិធិសម្ដេចតេជោ និង FASMEC ជាពិសេសគឺការប្តេជ្ញាចិត្តក្នុងការជំរុញផលិតផលខ្មែរ ក្រោមយុទ្ធនាការ «រួមគ្នាផលិត រួមគ្នាប្រើប្រាស់ផលិតផលជាតិ»។ ជាមួយគ្នានេះ ឧកញ៉ាប្រធានក៏បានលើកឡើងពីកិច្ចខិតខំប្រឹងប្រែងរបស់សហគ្រាសធុនតូច និងមធ្យម (SMEs) ក្នុងការកែច្នៃផលិតផលធម្មជាតិ ដែលស្របទៅនឹងគោលការណ៍អភិវឌ្ឍន៍បៃតង។
ជាការឆ្លើយតប ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានសម្តែងនូវការកោតសរសើរ និងវាយតម្លៃខ្ពស់ចំពោះតួនាទីរបស់សមាគម និង FASMEC ដែលបានចូលរួមយ៉ាងសកម្មក្នុងការលើកកម្ពស់សេដ្ឋកិច្ចជាតិ តាមរយៈការគាំទ្រសហគ្រិនក្នុងស្រុក។ ឯកឧត្តមរដ្ឋមន្ត្រី ក៏បានផ្តល់នូវអនុសាសន៍គន្លឹះមួយចំនួន ពាក់ព័ន្ធនឹង៖
ការអភិវឌ្ឍន៍ដោយចីរភាព៖ ការជំរុញឱ្យសហគ្រាសធុនតូច និងមធ្យម បង្កើនការយកចិត្តទុកដាក់លើខ្សែច្រវាក់ផលិតកម្មដែលមិត្តភាពចំពោះបរិស្ថាន (Green Business)។
ការកាត់បន្ថយការប្រើប្រាស់ប្លាស្ទិក៖ ការលើកទឹកចិត្តឱ្យមានការប្រើប្រាស់ការវេចខ្ចប់បែបធម្មជាតិ ដើម្បីចូលរួមក្នុងយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ»។
ការពង្រីកសក្តានុពលផលិតផលខ្មែរ៖ ការពង្រឹងគុណភាព និងស្តង់ដារបរិស្ថាន ដើម្បីបង្កើនលទ្ធភាពប្រកួតប្រជែងលើទីផ្សារអន្តរជាតិ។
ជំនួបនេះ បានបញ្ចប់ទៅក្រោមបរិយាកាសស្និទ្ធស្នាល និងទទួលបានលទ្ធផលជាផ្លែផ្កា ដោយថ្នាក់ដឹកនាំសមាគមបានប្តេជ្ញានឹងយកអនុសាសន៍ណែនាំរបស់ឯកឧត្តមរដ្ឋមន្ត្រី ទៅអនុវត្តឱ្យមានប្រសិទ្ធភាព ដើម្បីចូលរួមចំណែកជាមួយរាជរដ្ឋាភិបាល ក្នុងការកសាងកម្ពុជាឱ្យក្លាយជាប្រទេសដែលមានអព្យាក្រឹតកាបូន និងមានបរិស្ថានស្អាតស្រស់បំព្រង៕
.jpg)
