ខេត្តព្រៃវែង ៖ ដេប៉ូលក់ខ្សាច់ជាច្រើនកន្លែងនៅក្នុងឃុំអ្នកលឿង ស្រុកពាមរក៍ ខេត្តព្រៃវែង បង្កការប៉ះពាល់រំខានដល់ការរស់នៅរបស់បងប្អូនប្រជាជនសងខាងផ្លូវនឹងអ្នកធ្វើដំណើរ ។ ដោយសារម្ចាស់ដេប៉ូលក់ខ្សាច់ទាំងនោះប្រើប្រាស់រថយន្តធំៗដឹកជញ្ជូនខ្សាច់ដាក់ហៀរៗផ្លូវ វិចខ្ចប់មិនបានត្រឹមត្រូវ បើកបរលឿនៗបង្កអោយទឹកនឹងដីខ្សាច់ជ្រុះហូរពេញលើតាមដងផ្លូវធ្វើអោយផ្លូវកៅស៊ូ ឬផ្លូវបេតុងក្លាយទៅជាផ្លូវដីខ្សាច់ បង្កការលំបាកដល់អ្នកធ្វើដំណើរធ្ងន់ធ្ងរនឹងអាចប្រឈមកើតមានករណីគ្រោះថ្នាក់ចរាចរណ៍ទៀតផង ។
ជាពិសេសនៅពេលស្ងួតទឹកពិបាកធ្វើដំណើរដោយសារហុយដីខ្សាច់ឡើងទ្រលោមប៉ះពាល់ដល់បរិស្ថាន និងសុខភាពផ្លូវដង្ហើមរបស់ប្រជាជនយ៉ាងធ្ងន់ធ្ងរ ។ មិនតែប៉ុណ្ណោះការដឹកជញ្ជូនក៏សុទ្ធតែផ្ទុកលើសទម្ងន់ដែរ ទើបធ្វើអោយផ្លូវដែលទើបនឹងសាងសង់រួចបើកអោយដំណើរការមិនទាន់បានប៉ុន្មានផង ក៍មានកន្លែងខ្លះមានទឹកដក់ស្រុតប្រះបណ្តើរៗហើយដែរ ។
ជុំវិញបញ្ហាខាងលើនេះ អង្គភាពសារព័ត៌មាន ណាញធីវី មិនអាចសុំការបំភ្លឺពីលោក កៅ ពិសី អភិបាលស្រុកពាមរក៍ បាននោះទេ គិតត្រឹមរសៀលថ្ងៃទី១៥ ខែឧសភា ឆ្នាំ២០២៦នេះ ដោយសារពុំមានលេខទំនាក់ទំនង ទោះជាយ៉ាងណា អង្គភាពសារព័ត៌មាន ណាញធីវី នូវតែរង់ចាំការបំភ្លឺគ្រប់ភាគីពាក់ព័ន្ធទាំងអស់រៀងរាល់ម៉ោងធ្វើការ ឬទំនាក់ទំនងតាមលេខ៖ 012 799 572 ណាញធីវី នឹងធ្វើបច្ចុប្បន្នភាពរឿងនេះបន្តទៀតនៅវគ្គក្រោយ៕
